CCM GAIRO YATAKA KUPATIWA MAJIBU JUU YA KERO YA MAJI.

CHAMA cha Mapinduzi CCM wilaya ya Gairo kimeitaka wizara ya maji kuwapa majibu sahihi na ya uhakika juu ya lini mradi mkubwa wa maji unaofadhiliwa na Benki ya Dunia utakamilika  na wananchi wa wilaya hiyo kuondoakana na kero kubwa ya maji inayowakabili.

 

Mwenyekiti wa CCM wilaya Hiyo Omar Awadhi alisema hayo jana wakati wa ziara ya katibu wa CCM mkoa wa Morogoro Rojas Romuli na viongozi wa CCM wilaya hiyo kutembelea mradi huo uliopo katika kata ya Gairo.

Awadhi alisema kuwa pamoja na ahadi aliyoitoa waziri wa Maji Jumanne Magembe alipotembelea mradi huo ya kukamilika kwa mradi huo ifikapo mwishoni mwa mwezi Januari 2014 lakini bado wana wasiwasi huenda azma hiyo isitimie kutokana na kusuasua kwa mradi huo.

Alisema kuwa CCM ndio yenye dhamana ya wananchi na kwamba inapotokea kero kama hizo ni lazima wawe na majibu ya uhakika ya kuwapa wananchi ili waweze kuelewa na kuendelea kukipa dhamana chama cha Mapinduzi.

Kwa upande wake Yakoba Madongo kaimu mkurugenzi wa mamlaka ya maji wilaya ya Gairo alisema kuwa mradi huo ulikadiriwa kugharimu kiasi cha shilingi bilioni 6.7 lakini hadi sasa zinatarajiwa kutumika zaidi ya bilioni 7 kutokana na mahitaji mbamilmbali yaliojitokeza ambayo awali wakati wa maandalizi ya mradi hayakuhesabiwa.

Alisema kuwa miongoni mwa mahitaji hayo ni pamoja na tank la lita 300,000  la kuchujia maji ya chumvi pamoja na vibanda 40 vya kuchotea maji.

Alisema kuwa hadi sasa tayari wameshajenga matank 3, ambapo mawili ni ya uwezo wa kuchukua lita 300,000 kila moja pamoja na lenye uwezo wa kuchukua lita 1,000,000  ambalo litatumika katika usambazaji wa maji.

Alisema kuwa mradi huo ulikuwa ukamilike  baada ya wiki 18 tangu ulipoanza, ambayo ingekuwa Februari 2012 lakini hadi sasa bado haujakamilika kutokana na maji yaliyopatikana kuwa ni ya chumvi na kwamba ni lazima lipatikane chujio la kuchuja maji hayo sambamba na kuangalia ni wapi chumvi itakayopatikana baada ya maji kuchujwa itatupwa.

Alisema kuwa tatizo la maji kuwa ni ya chumvi lingeweza kuepukwa kama wenyeji wangeshirikishwa kwani wanajua ni eneo gani lina maji safi yasiyo na chumvi.

Katibu wa CCM mkoa wa Morogoro Rojas Romuli  aliwataka wataalamu katika sekta mbalimbali kuwashirikisha wananchi wa eneo husika  wanapotekeleza miradi ya maendeleo ili kuepuka kutekeleza miradi isiokuwa na taija ambayo inaingizia hasara Taifa.

Hata hivyo alisema kuwa wananchi wanatakiwa kutambua kuwa miradi hiyo ni mali yao hivyo jukumu la ufutiliaji wa maendeleo ya miradi hiyo  katika hatua zote ni lao na siyo la serikali kama ambavyo wengi wanadhania, hali inayosababisha miradi mingi kukwama, kuchelewa, au kutekelezwa chini ya kiwango.