WAZAZI wilayani Kilombero mkoani Morogoro wameitaka serikali
kuacha kuwatumia walimu wakuu kukaimu nafasi za utendaji wa kijiji hali inayosababisha walimu hao kushindwa
kufanya majukumu yao ya elimu.
Wazazi hao walisema hayo jana wakati wa ziara ya katibu wa
CCM mkoa wa Morogoro Rojas Romuli alipotembelea wilayani kilombero katika ziara
yake ya kikazi.
Mmoja wa wazazi hao Agatuni Malilima mkazi wa kata ya Kisawasa akizungumza
kwa niaba ya wenzake alisema kuwa ni
lazima serikali ichukue hatua za haraka kuajiri watendaji wa vijiji ili kuepuka
adha hiyo ambayo inapelekea kushuka kwa elimu wilayani humo.
‘’ Tatizo hili ni sugu katika maeneo mbalimbali Huku
Kilombero, unakuta mtendaji wa kijiji yupo mmoja tu katika vijijiji 6 ambapo
wengiene wote wanaokaimu ni walimu’’ Alisema.
Kwa upande wake Mwenyekiti wa Halmashauri ya wilaya ya
Kilombero David Ligazio alikiri kuwepo kwa tatizo hilo na kwamba linatokana na
ajira zote za watumishi wa serikali zinatoka tume ya utumishi wa umma.
‘’ Ni kweli upo upungufu mkubwa wa watumishi hao,
tulishapeleka kero hii lakini bado haijashughulikiwa’’ alisema mwenyekiti huyo.
Aidha alisema kuwa waliomba waziri wa wizara husika kusaini
kanuni ambazo zitawapa fulsa ya kuajiri watumishi wa nafasi za ngazi za chini ili kupunguza kero
hiyo.
Alisema kuwa kero hiyo sio kwa watendaji tu bali hata katika
sekta ya afya na kwamba wauguzi waliopo hawakidhi mahitaji.
Hakuna maoni:
Chapisha Maoni