MTIBWA KUANZA KULIPA WAKULIMA JANUARI 30

 Yaani siwezi kuwa mpumbavu kuwaruhusu eti mkatandike mikeka katika kiwanda cha Mtibwa mkidai fedha zenu, Ni mkuu wa wilaya ya Mvomero Antoni Mtaka wakati akiongea na wafanyakazi, wastaafu,  na wakulima wa kiwanda cha sukari cha Mtibwa wilayani humo ambao walitaka kujua muafaka wa madai yao.

 Ni lazima tujadiliane kwa makini tupate ufumbuzi, anayesema maneno yangu ni siasa, siasa haziko hapa ziko huko. Ni Dc Mtaka akiwajibu wakulima hao waliomwambia kuwa anayoongea ni siasa na kwamba hakuna utekelezaji.

 Tunachotaka hapa leo ni kulipwa fedha zetu na sio vinginavyo, ni mmoja wa wakulima wa miwa  Mtibwa Turiani akiongea katika mkutano huo wa maelfu ya watu.

Tufanye hivi leo ni Jumanne, hawa watu tuanze kuwalipa ifikapo Alhamisi au unasemaje? meneja msaidizi Kiula akinong'ona na meneja mkuu wa kiwanda hicho Hamad Yahaya.

KIWANDA cha sukari cha Mtibwa kilichopo wilaya ya Mvomero kimetakiwa kusitisha shughuli zake za uzalishaji hadi watakapomaliza kulipa madeni ya wakulima miwa  na wafanyakazi wa kiwanda hicho.

Agizo hilo limetolewa na mkuu wa wilaya ya Mvomero antoni Mtaka baada ya mabishano ya muda mrefu juu ya madai ya wakulima wanayodai kiwanda hicho zaidi ya bilioni 1.9 za mauzo ya miwa na mishahara ya wafanyakazi wa kiwanda hicho.

Mkuu huyo wa wilaya alisema kuwa shughuli za huduma ya afya zinazotolewa na kiwanda hicho pamoja  na ulinzi na shughuli za uhasibu zitaendelea ili kuwezesha wananchi hao kupata mafao hayo mwishoni mwa wiki hii kama ilivyoahidiwa na uongozi wa kiwanda hicho.

Aidha kutokana na mabishano na kutoelewana katika mkutano huo kamati ya ulinzi na usalama na baadhi ya viongozi wa serikali na halimashauri na  wawakilishi wa wanasiasa walilazimika kukaa chemba kwa muda wa nusu saa kwaajili ya kujadili suala hilo na kuja na maamuzi hayo na kusitisha shughuli hizo.

Hata hivyo mkuu huyo alisema kuwa kutokana na malalamiko ya wakulima na wafanyakazi hao ya kuwa watoto wao wamasimamsihswa shule kutokana  na kukosa ada ameagiza wanafunzi hao wote kuendelea na masomo hadi hapo wazazi wao watakapolipwa fedha zao.

Awali Uongozi wa kiwanda hicho ukiwakilishwa na meneja mkuu Hamad  Yahaya  Juma alisema kuwa kiwanda hicho kinatarajia kuanza kulipa madeni hayo kuanzia Januari 30 mwaka huu.

Meneja huyo alisema kuwa kiwanda hicho kilikwama kulipa madeni hayo kutokana na  uingizwaji mwingi wa sukari hapa nchini na hivyo kusababisha sukari ya kiwanda hicho kushindwa kupata soko.

Pia alisema kuwa makubaliano ya mwisho baina ya uongozi wa kiwanda hicho na wakulima na wafanyakazi hao ni kuwalipa ifikapo Februari 25 mwaka huu na kwamba alidai  wadai hao walikiuka na kuanza kudai kwa stahili nyingine ambayo anadai inaushawishi wa kisiasa.

Kwa upande wa wafanyakazi wa kiwanda hicho ambao walikuwa wakidai kiwanda hicho milioni 190 aliahidi kulipa Februari 15 mwaka huu.

Baada ya mkuu wa wilaya kutoa maazimio hayo wananchi hao ambao walikuwa na jazba walishusha jaziba zao na kutawanyika taratibu katika eneo hilo ambalo awali ililazimikwa kuwekewe ulinzi mkubwa wa askari wa kutuliza fujo wakiwa na bendara na mitutu ya bunduki kuhakikisha usalama unapatikana katika eneo hilo.